ලාෆ්ස් ගෑස් මිලත් ඉහළට - කිලෝ 12.5 සිලින්ඩරයක් රු. 6,740යි

අද (13) මධ්‍යම රාත්‍රියේ සිට ක්‍රියාත්මක වන පරිදි ලාෆ්ස් ගෑස් මිල ඉහළ දමා තිබෙනවා.

ඒ අනුව, රුපියල් 4,965ක්ව පැවති කිලෝග්‍රෑම් 12.5ක ගෘහස්ථ ගෑස් සිලින්ඩරයක මිල රුපියල් 1,775කින් ඉහළ නංවා ඇති අතර, එහි නව මිල රුපියල් 6,740ක්.

එමෙන්ම, රුපියල් 1,988ක්ව පැවති කිලෝග්‍රෑම් 5ක ගෑස් සිලින්ඩරයක මිල රුපියල් 732කින් ඉහළ දමා තිබෙනවා. ඒ අනුව එහි නව මිල රුපියල් 2,720ක් වනවා.

ජාත්‍යන්තර වෙළෙඳපොළේ මිල ගණන් අනුව ශ්‍රී ලංකාවට ගෑස් තොග මිලදී ගැනීමේ පිරිවැය ඉහළ යාම මෙම මිල සංශෝධනයට හේතු වී ඇති බවයි ලාෆ්ස් ගෑස් සමාගම සඳහන් කරන්නේ.

කෙසේ වෙතත්, අලෙවි නියෝජිත ජාලය හරහා අඛණ්ඩව ගෑස් සැපයීම පවත්වාගෙන යාමට සියලු උත්සාහයන් ගන්නා බවද සමාගම තහවුරු කර තිබෙනවා.

ගෑස් නැවත පිරවුම් ලබාගත හැකි ස්ථාන සහ දිස්ත්‍රික්ක අනුව පවතින මිල ගණන් පිළිබඳ තොරතුරු 1345 දුරකථන අංකය ඇමතීමෙන් ලබාගත හැකි බවයි වැඩිදුරටත් සඳහන් වන්නේ.