අනෝජන් සිවරාසාගේ දඩුවම ඉවත් කරන්න දායක වූ සියලු දෙනාටම ස්තුතියි - සජිත් ප්‍රේමදාස

සෞදි අරාබියේ රැකියාවක නිරතව සිටි ශ්‍රී ලාංකික ඉංජිනේරු අනෝජන් සිවරාසා මහතාට පනවා තිබූ මරණ දඬුවම අහෝසි කිරීමට එරට රජය ගත් තීරණය සම්බන්ධයෙන් සතුට පළ කරන බව විපක්ෂ නායක සජිත් ප්‍රේමදාස මහතා පවසනවා.

විපක්ෂ නායකවරයා සඳහන් කළේ ඒ වෙනුවෙන් කැපවූ සියලු දෙනාට සිය ගෞරවය සහ ස්තූතිය පිරිනමන බවයි.

අනෝජන් සිවරාසා මහතාගේ ජීවත් වීමේ අයිතිය තහවුරු කිරීම සඳහා කැපවූ ෆයිසර් මුස්තාෆා, උපුල් කුමරප්පෙරුම යන මහත්වරුන් ඇතුළු නීතිඥ කණ්ඩායමටත්, ශ්‍රී ලංකාවේ සෞදි තානාපතිවරයා ඇතුළු ඊට දායක වූ සියලු දෙනාටත් ඔහු සිය ස්තූතිය පළ කර තිබෙනවා.

මෙම කටයුත්ත වෙනුවෙන් තමන් ඇතුළු පිරිසට කළ හැකි උපරිම දායකත්වය ලබාදුන් බව සඳහන් කළ සජිත් ප්‍රේමදාස මහතා, අනෝජන් සිවරාසා මහතාගේ ජීවිතය බේරා ගැනීමට හැකිවීම පිළිබඳව අතිශය සතුටට පත්වන බව ද ප්‍රකාශ කළා.

එමෙන්ම, මේ සම්බන්ධයෙන් ගත් තීරණය වෙනුවෙන් සෞදි අරාබියේ ශ්‍රේෂ්ඨාධිකරණයට සහ එරට රජුට ද සිය ස්තූතිය පිරිනමන බව විපක්ෂ නායකවරයා වැඩිදුරටත් සඳහන් කළා.