අධිකරණ තීන්දුවට ගරු කරනවා - ඥානසාර හිමිට සමාව දුන්නේ මාව නොමඟ යවලා - මෛත්‍රීපාල

ගලගොඩඅත්තේ ඥානසාර හිමියන්ට ජනාධිපති සමාව ලබාදීමේ ක්‍රියාවලියේදී ජනාධිපති ලේකම් කාර්යාලයේ නිලධාරීන් තමන් නොමඟ යැවූ බව හිටපු ජනාධිපති මෛත්‍රීපාල සිරිසේන මහතා පවසනවා.

ඒ හේතුවෙන් අදාළ ලේඛනවල තාක්ෂණික දෝෂයක් ඇතිවූ අතර, එය පසුව ඥානසාර හිමියන්ට යළිත් සිරගත වීමට හේතු වූ බවයි ඔහු සඳහන් කරන්නේ.

ඊයේ (19) නිකුත් කළ නිවේදනයකින් හිටපු ජනාධිපතිවරයා මේ බව ප්‍රකාශ කර තිබෙනවා.

අදාළ නඩු තීන්දුවේ පිටපතක් අධ්‍යයනය කළ පසු, ජනාධිපති ලේකම් කාර්යාලය ඉදිරිපත් කළ ලේඛනවල පැවති තාක්ෂණික දෝෂයක් අධිකරණ තීරණයට බලපා ඇති බව තමන්ට අවබෝධ වූ බවද ඔහු සඳහන් කළා.

ඥානසාර හිමියන්ට හෝමාගම මහේස්ත්‍රාත් අධිකරණයේ B 7417/10 සහ 40042 යන නඩු දෙකක් පැවති බවත්, සමාව ලබාදීම සම්බන්ධයෙන් අධිකරණ හා බන්ධනාගාර කටයුතු අමාත්‍යාංශයේ අනුමැතිය අවශ්‍ය බව නීති කටයුතු භාර අතිරේක ජ්‍යෙෂ්ඨ ලේකම්වරයා තමන්ට දැනුම් දුන් බවත් මෛත්‍රීපාල සිරිසේන මහතා කියා සිටියා.

කෙසේ වෙතත්, අවශ්‍ය ලේඛන අදාළ අමාත්‍යාංශයට යොමු නොකර තම අත්සන ලබාගෙන ඇති බවට ඔහු චෝදනා කරනවා.

එය තමන් නොමඟ යැවීමක් බවයි හිටපු ජනාධිපතිවරයා සඳහන් කළේ.

මෙම දෝෂය හේතුවෙන්, පායිකියසෝති සරවනමුත්තු මහතා සම්බන්ධ සංවිධානයක් පිළිබඳව සඳහන් කරමින් සන්ධ්‍යා එක්නැලිගොඩ මහත්මිය ඉදිරිපත් කළ පැමිණිල්ලකින් ආරම්භ වූ නීතිමය ක්‍රියාමාර්ගවලින් අනතුරුව ඥානසාර හිමියන්ට යළිත් සිරගත වීමට සිදුවූ බවද ඔහු ප්‍රකාශ කළා.

අධිකරණ තීන්දුවට තමන් ගරු කරන බවත්, එම තීන්දුව නිවැරදි බව පිළිගන්නා බවත් මෛත්‍රීපාල සිරිසේන මහතා වැඩිදුරටත් සඳහන් කර තිබෙනවා.

එමෙන්ම, තම පාලන සමයේ සේවය කළ නිලධාරීන් අතින් මෙම වරද සිදුවූ බව පවසමින් බෞද්ධ භික්ෂූන් වහන්සේලාගෙන් සමාව අයැද සිටින බවද ඔහු ප්‍රකාශ කළා.

ඥානසාර හිමියන්ට ලබාදුන් ජනාධිපති සමාව සම්බන්ධ තාක්ෂණික දෝෂය පිළිබඳව භික්ෂූන් වහන්සේලා, මාධ්‍යවේදීන් සහ මහජනතාව කළ විමසීම්වලට පිළිතුරු වශයෙන් මෙම නිවේදනය නිකුත් කළ බවද හිටපු ජනාධිපතිවරයා සඳහන් කර තිබෙනවා.