බැසිල්ට රතු වරෙන්තු ලබාගන්න - අධිකරණයෙන් නියෝගයක්

සංචාරක ප්‍රවර්ධන කාර්යාංශයේ මුදල් අවභාවිත කිරීමේ සිද්ධිය සම්බන්ධයෙන් හිටපු ආර්ථික සංවර්ධන අමාත්‍ය බැසිල් රාජපක්ෂ මහතා අත්අඩංගුවට ගෙන අධිකරණයට ඉදිරිපත් කරන ලෙස කොටුව මහේස්ත්‍රාත් පසන් අමරසේන මහතා අද (14) නියෝග කළා.

ඒ අනුව, අවශ්‍ය ක්‍රියාමාර්ග ගන්නා ලෙස අපරාධ පරීක්ෂණ දෙපාර්තමේන්තුවේ නීතිවිරෝධී වත්කම් විමර්ශන ඒකකයට මහේස්ත්‍රාත්වරයා නියෝග කර තිබෙනවා.

එමෙන්ම, බැසිල් රාජපක්ෂ මහතා සම්බන්ධයෙන් ජාත්‍යන්තර පොලිසිය හරහා රතු නිවේදන ලබාගැනීමට අවශ්‍ය පියවර ගන්නා ලෙස ද අධිකරණය නියෝග කළා.

අපරාධ පරීක්ෂණ දෙපාර්තමේන්තුව විසින් අධිකරණයට ඉදිරිපත් කළ කරුණු සලකා බැලීමෙන් අනතුරුව මෙම නියෝගය නිකුත් කර තිබෙනවා.

2014 වසරේදී සංචාරක ප්‍රවර්ධන කාර්යාංශයට ලබාදී තිබූ රුපියල් මිලියන 7.8ක මුදලක් එහි ප්‍රවර්ධන කටයුතු සඳහා වැය නොකර, ඌව පළාත් සභා මැතිවරණය වෙනුවෙන් ටී ෂර්ට් 12,000ක් ලබාදීමට යොදාගැනීමෙන් රජයට පාඩුවක් සිදුකළ බවට එල්ල වන චෝදනාවක් සම්බන්ධයෙන් අපරාධ පරීක්ෂණ දෙපාර්තමේන්තුවේ නීතිවිරෝධී වත්කම් විමර්ශන ඒකකය මෙම නඩුව අධිකරණයට වාර්තා කර ඇති බව සඳහන්.