2026-11-16 16:32:00 Hours
යෝජිත අනුරාධපුර පූජාභූමි සංවර්ධන සැලැස්ම කඩාකප්පල් නොකර, එය ක්රියාත්මක කිරීම සඳහා අවශ්ය සහාය ලබාදෙන ලෙස වැඩබලන අටමස්ථානාධිපති, රුවන්වැලි චෛත්යරාමාධිකාරී පූජ්ය ඊතල්වැටුණුවැවේ ඥානතිලක හිමියන් ඉල්ලීමක් කරනවා.
උන්වහන්සේ මේ බව සඳහන් කළේ අද (16) පෙරවරුවේ බුද්ධ ශාසන අමාත්යාංශයේ පැවති ප්රවෘත්ති සාකච්ඡාවකට එක්වෙමින්.
අනුරාධපුර පූජාභූමිය තුළ සංවර්ධන වැඩසටහන් ක්රියාත්මක කිරීමේදී අවශ්ය තීන්දු තීරණ ගැනීම සඳහා පත්කර ඇති ජනාධිපති උපදේශක සභාවේ රැස්වීමක් ද අද පෙරවරුවේ එම අමාත්යාංශයේදී පැවැත්වුණා.
ඒ, එහි සම සභාපතිවරුන් වන පූජ්ය ඊතල්වැටුණුවැවේ ඥානතිලක හිමියන් සහ ජනාධිපති කාර්ය මණ්ඩල ප්රධානී ප්රභාත් චන්ද්රකීර්ති මහතාගේ ප්රධානත්වයෙන්.
එහිදී අදහස් දැක්වූ ඥානතිලක හිමියන් කියා සිටියේ යෝජිත සංවර්ධන සැලැස්ම සම්බන්ධයෙන් ඇතැම් කරුණු පිළිබඳව ජනතාව නිසි පරිදි දැනුවත් කිරීමට නොහැකි වීම පිළිබඳව කනගාටුවට පත්වන බවයි.
එමෙන්ම පූජාභූමිය වටා ඉදිකිරීමට යෝජනා කර තිබූ වැට සම්බන්ධයෙන් ද ජනතාව තුළ වැරදි අවබෝධයක් ඇති වී තිබූ බව උන්වහන්සේ පෙන්වා දුන්නා.
පූජා නගරය තුළ පදිංචිව සිටින ජනතාව ඉවත් කිරීමේ කිසිදු අදහසක් හෝ සැලසුමක් නොමැති බවද උන්වහන්සේ වැඩිදුරටත් අවධාරණය කළා.
“ජන විඥානය තේරුම් අරගෙන යමක් සමාජගත කරන්නට බැරි වීම ගැන ඇත්තටම කනගාටු වෙනවා. අපට මේකේ තිබුණු යම් යම් කරුණු කාරණා පිළිබඳව මුලදීම ජනතාව දැනුවත් කරන්න බැරි වුණා. උදාහරණයක් විදිහට මේ වැට සම්බන්ධයෙන් කතාබහක් ඇති වුණා.
මීට දශක එකහමාරකට පමණ පෙරත් මෙහි වැටක් ඉදිකර තිබුණා. එම වැටේ ඉතිරි කොටස සංරක්ෂණය කරමින් නැවත නිර්මාණය කිරීමේ ඉල්ලීමක් අපවත් වී වදාළ නායක ස්වාමීන් වහන්සේගෙන් ඉදිරිපත් වී තිබුණා.
මේ වැට ඉදිකිරීමට යෝජනා කළේ වෙනත් අරමුණක් වෙනුවෙන් නෙමෙයි. ගවයන් ඇතුළුවීම, මල් සහ කුරුම්බා දැමීම, පුරාවිද්යා ස්මාරක මත වාහන නැවැත්වීම සහ අනවසර ඉදිකිරීම් වැනි කටයුතු නිසා මෙම ස්මාරක විනාශයට පත්වන නිසයි වැටක් ඉදිකිරීමට යෝජනා කර තිබුණේ. ඇත්තටම එම වැට ඉදිකිරීමට නියමිතව තිබුණේ පූජාභූමියට බොහෝ ඈතින්. කෙසේ වෙතත්, දැන් මේ වැට සම්බන්ධයෙන් අපේ අදහසක් නැහැ. ඒක අතහැරලා ඉවරයි.
පූජා නගරය තුළ පදිංචිව සිටින ජනතාව ඉවත් කරනවා කියලා කතාවක් තිබෙනවා. නමුත් එවැනි අදහසක්වත්, සංකල්පයක්වත් නැහැ. වර්ග කිලෝමීටර් 28ක්ව තිබූ භූමි ප්රමාණය වර්ග කිලෝමීටර් 38ක් වුණේ ඇයි කියලා ජනතාවට විශාල ප්රශ්නයක් ඇති වුණා.
ඇත්තටම ලක්ෂයක ජනතාවක් පැමිණෙනවා නම් කාර් 25,000ක්, වෑන් රථ 10,000ක් හෝ බස් රථ 5,000ක් පැමිණිය යුතුයි.
එලෙස විශාල පිරිසක් පැමිණි පසු ඔවුන් නිසි පරිදි කළමනාකරණය කරගැනීමත් ඉතාම අපහසු කාර්යයක්. උදාහරණයක් විදිහට පොසොන් උත්සවයට සාමාන්යයෙන් ලක්ෂ 13කට ආසන්න ජනතාවක් සහභාගි වෙනවා. ඒ නිසා මේ සම්බන්ධයෙන් අනවශ්ය බියක් ඇති කරගන්න එපා.
රජවරු එකසිය හතර දෙනෙක් මේ නගරය ආරක්ෂා කරා.. ඒ නිසා අනාගතයටත් එහෙම වෙනවා. කවදාවත් අයහපත් චේතනාවක් මේ සම්බන්ධව තියාගන්න නම් එපා.
මොකද හේතුව, මේකේ තියෙන වැලි ඇටයක්, ගල් ඇටයක් ගානේ බුදු, පසේ බුදු, මහරහතන් වහන්සේලාගේ ස්පර්ශය ලබපු ශුද්ධ භූමියක්. මේ භූමිය රකින්න, ආරක්ෂා කරන්න, මේ බෞද්ධයෝ විතරක් නෙමෙයි, අබෞද්ධයෝ පවා කැපවෙලා තියෙනවා.
ඒ නිසා, අපි හැම කෙනෙකුගේම යුතුකම, වගකීම තියෙන්නේ, මේවා රැකගන්න.. ආරක්ෂා කරගන්න.. මේවා ප්රතික්ෂේප කරලා, මේවා කඩාකප්පල් කරන්න එපා.මේවාට උදව් කරන්න, ඔබතුමාලගේ අදහස් දෙන්න.''
මෙම වෙබ් අඩවියේ පළකරනු ලබන පුවතක් හේතුවෙන් යම් පුද්ගලයකුට, ආයතනයකට හෝ පාර්ශ්වයකට අගතියක් සිදුවන බව හැඟේ නම් හෝ යම් තොරතුරක් නිවැරදි විය යුතු යැයි හැඟෙන්නේ නම්, ඊට අදාළව ප්රතිචාර දැක්වීමට අප වෙබ් අඩවියේ පරිශීලකයින්ට පූර්ණ අයිතිය හිමිය.
ලංකා ලයිව් නිරන්තරයෙන් නිවැරදි තොරතුරු වාර්තා කිරීමට බැඳී සිටින අතර, මාධ්යය වෘත්තීය ආචාරධර්මවලට අනුගත වෙමින් සෑම විටෙකම පිළිතුරු ලබාදීමේ අයිතියට ගරුකරයි.
ඒ වෙනුවෙන් ඔබේ ප්රතිචාර කරුණාකර අපට දැනුම්දෙන්න.
ඊමේල් –hello@lankalive.lk