කස්සප හිමි සමඟ සිටිය දී අත්අඩංගුවට ගත් පුද්ගලයා විෂ මත්ද්‍රව්‍ය භාවිත කර සිටි බවට හෙළිවෙයි

අනුරාධපුර පූජා භූමියේ සත්‍යග්‍රහයක නිරතව සිටින බලංගොඩ කස්සප හිමියන් සමඟ සිටියදී පොලිස් රාජකාරියට බාධා කිරීමේ චෝදනා මත අත්අඩංගුවට ගත් පුද්ගලයෙකු හෙරොයින් සහ ගංජා භාවිත කර සිටි බවට සිදුකළ පරීක්ෂණවලදී අනාවරණ වී තිබෙනවා.

මෙලෙස අත්අඩංගුවට ගෙන ඇත්තේ බලදුර රංගිරියලාගේ ප්‍රසාද් සුසන්ත ජයසිරි නොහොත් දහම් ප්‍රසාද් නමැති පුද්ගලයායි.

පසුගියදා අනුරාධපුර රුවන්වැලි මහා සෑය අසල පොලිසිය සහ භික්ෂූන් වහන්සේලා අතර ඇති වූ නොසන්සුන්කාරී සිද්ධිය සම්බන්ධයෙන් සිවිල් පුද්ගලයන් දෙදෙනෙකු අත්අඩංගුවට ගෙන තිබුණා.

අනුරාධපුර පූජා නගර සැලැස්මට විරෝධය පළ කරමින් පැවැත්වූ සත්‍යග්‍රහයේ නිරත භික්ෂූන් වහන්සේලා සහ ඊට සහාය දැක්වූ සිවිල් පිරිස එම ස්ථානයෙන් ඉවත් කිරීමට පොලිසිය උත්සාහ කිරීමත් සමඟ මෙම නොසන්සුන්කාරී තත්ත්වය හටගෙන තිබූ අතර, පසුව එය ගැටුමක් දක්වා වර්ධනය වී තිබුණා.