වාහන ආනයන බදු මත පනවා ඇති 50% අධිභාරය දෙසැම්බර් දක්වා දීර්ඝ කරයි

වාහන ආනයන බදු මත රජය විසින් පනවා තිබූ 50%ක අධිභාරය ලබන දෙසැම්බර් 31 වැනිදා දක්වා දීර්ඝ කර තිබෙනවා.

මෙම අධිභාරය හෙට (15) දිනයෙන් අවසන් වීමට නියමිතව තිබූ අතර, ඒ අනුව හෙට සිට දෙසැම්බර් 31 වැනිදා දක්වා තවත් දීර්ඝ කර ඇති බව සඳහන්.

1988 අංක 83 දරන පනතින් සංශෝධිත රේගු ආඥා පනතේ 10 අ වගන්තිය යටතේ ජනාධිපතිවරයා වෙත පැවරී ඇති බලතල අනුව මෙම දීර්ඝ කිරීම සිදුකර තිබෙනවා.

කෙසේ වෙතත්, පසුගිය මැයි 15 වැනිදා හෝ ඊට පෙර ණයවර ලිපි විවෘත කර ඇති මෝටර් රථ ආනයනයන් සඳහා මෙම නියමය අදාළ නොවන බවද සඳහන්.

ඒ අනුව, අදාළ දිනයට පෙර ණයවර ලිපි විවෘත කර ඇති වාහන ආනයනයන් මෙම අධිභාර දීර්ඝ කිරීමෙන් බලපෑමට ලක් නොවනු ඇති.