ශ්‍රී ලංකාව සුළුකොට තකන්න එපා

ඉදිරියේදී පැවැත්වීමට නියමිත තීරණාත්මක ද්විත්ව ටෙස්ට් තරගාවලියේදී ශ්‍රී ලංකා කණ්ඩායම කිසිසේත්ම සුළුකොට නොසලකන ලෙස ඉන්දීය ක්‍රිකට් දැවැන්තයෙකු වන සුනිල් ගාවස්කාර් (Sunil Gavaskar) ඉන්දීය කණ්ඩායමට දැඩි ලෙස අවවාද කර සිටිනවා.

මව්බිමේදී ශ්‍රී ලංකාව ඉතා ප්‍රබල ප්‍රතිවාදියෙකු වන බැවින් මෙම සංචාරය ඉන්දියාවට පහසු නොවනු ඇති බවයි ඔහු පෙන්වා දෙන්නේ.

එළඹෙන අගෝස්තු 15 වනදා ආරම්භ වන මෙම තරගාවලිය, ලෝක ටෙස්ට් ශූරතා (WTC) අවසන් මහා තරගයට සුදුසුකම් ලැබීමේ ඉන්දීය අපේක්ෂා සාර්ථක කරගැනීම සඳහා අතිශයින් වැදගත්.

"Sportstar" සඟරාව වෙත අදහස් දක්වමින් ගාවස්කාර් වැඩිදුරටත් සඳහන් කළේ,

"මෙම ටෙස්ට් තරග දෙකම ජයග්‍රහණය කිරීම නව ටෙස්ට් තරග වාරයට මෙන්ම ලෝක ටෙස්ට් ශූරතා අවසන් තරගයට පිවිසීමට කණ්ඩායමට විශාල ජවයක් ලබා දෙනවා. ක්‍රීඩකයෙක් කෙතරම් විශිෂ්ටයෙකු වුවත්, පෞද්ගලික අවශ්‍යතාවලට වඩා සැමවිටම ඉන්දීය ක්‍රිකට් ක්‍රීඩාවට මුල්තැන දිය යුතුයි."

මේ අතර ශුබ්මන් ගිල්ගේ (Shubman Gill) නායකත්වයෙන් යුත් ඉන්දීය කණ්ඩායම මේ වන විට ලෝක ටෙස්ට් ශූරතා ප්‍රසාද ලකුණු සටහනේ 48.15%ක ප්‍රතිශතයක් සමඟ 5 වැනි ස්ථානයේ පසුවන අතර, ශ්‍රී ලංකාව 41.67%ක ප්‍රතිශතයක් ලබාගනිමින් 6 වැනි ස්ථානයේ පසුවනවා.

මෙම තරගාවලියේ ප්‍රතිඵලය අනුව ලකුණු සටහන වෙනස් විය හැකි ආකාරය පහත පරිදි වනවා,

ඉන්දියාව 2-0ක් ලෙස ජයගතහොත් - ඉන්දියාවේ ප්‍රතිශතය 57.58% දක්වා ඉහළ යනු ඇත.

තරගාවලිය 1-1ක් ලෙස සම වුවහොත් - ඉන්දියාවේ ප්‍රතිශතය 48.48%ක් ලෙස රඳවා ගනී.

ශ්‍රී ලංකාව 2-0ක් ලෙස ජයගතහොත් - ඉන්දියාවේ ප්‍රතිශතය 39.39% දක්වා පහත වැටෙන අතර, ශ්‍රී ලංකාව 61.11%ක ප්‍රතිශතයක් ලබාගනිමින් 4 වැනි ස්ථානය දක්වා ඉහළට පැමිණෙනු ඇත.

ඉදිරියේදී නවසීලන්තය සහ ඔස්ට්‍රේලියාවට එරෙහිවද ප්‍රබල ටෙස්ට් තරගාවලි නියමිතව ඇති බැවින්, ශ්‍රී ලංකා සංචාරයේදී ප්‍රසාද ලකුණු අහිමි කර නොගැනීම ඉන්දීය පිලට අතිශයින් තීරණාත්මක වනු ඇති.