ජානකී සිරිවර්ධන ඔක්තෝබර් 6 දක්වා රිමාන්ඩ්

පාර්ලිමේන්තු මන්ත්‍රී නාමල් රාජපක්ෂ මහතාට රුපියල් මිලියන 70ක මුදලක් අල්ලස් ලෙස ලබාදුන් බවට එල්ල වී ඇති චෝදනාව සම්බන්ධයෙන් අත්අඩංගුවට ගත් ක්‍රිෂ් සමාගමේ හිටපු අධ්‍යක්ෂිකා ජානකී සිරිවර්ධන මහත්මිය ඔක්තෝබර් 6 වැනිදා දක්වා රක්ෂිත බන්ධනාගාරගත කර තිබෙනවා.

ඒ කොළඹ ප්‍රධාන මහෙස්ත්‍රාත් අසංග එස්. බෝදරගම මහතා ලබාදුන් නියෝගයකට අනුවයි.

එමෙන්ම, මේ වනවිට රක්ෂිත බන්ධනාගාරගතව සිටින නාමල් රාජපක්ෂ මහතාගෙන් අදාළ විමර්ශනය සම්බන්ධයෙන් ප්‍රකාශයක් සටහන් කර ගැනීමට අල්ලස් හෝ දූෂණ විමර්ශන කොමිෂන් සභාවට අවසර ලබාදෙන ලෙසද මහෙස්ත්‍රාත්වරයා බන්ධනාගාර අධිකාරිවරයාට නියෝග කර තිබෙනවා.

නාගරික සංවර්ධන අධිකාරියට අයත් කොළඹ කොටුව ට්‍රාන්ස්වර්ක් චතුරස්‍රය නමැති භූමිය කඩිනමින් ලබාගැනීමට සහාය වීම සඳහා නාමල් රාජපක්ෂ මහතා වෙත රුපියල් මිලියන 70ක මුදලක් අල්ලස් ලෙස ලබාදුන් බවට ජානකී සිරිවර්ධන මහත්මියට චෝදනා එල්ල වී ඇත.

එම මුදල අවස්ථා තුනකදී ලබාදී ඇති බවටද අල්ලස් කොමිසම චෝදනා කරනවා.

අල්ලස් කොමිසමේ නිලධාරීන් සහ සැකකාරිය වෙනුවෙන් පෙනී සිටි නීතිඥවරුන් ඉදිරිපත් කළ කරුණු සලකා බැලීමෙන් අනතුරුව මහෙස්ත්‍රාත්වරයා මෙම නියෝගය නිකුත් කර තිබෙනවා.