එංගලන්තය හමුවේ ශ්‍රී ලංකාවට ලකුණු 119ක දැවැන්ත පරාජයක්

සංචාරක ශ්‍රී ලංකා කණ්ඩායම සමඟ පැවති පළමු විස්සයි20 ක්‍රිකට් තරගයෙන් ලකුණු 119ක දැවැන්ත ජයක් වාර්තා කිරීමට එංගලන්ත කණ්ඩායම සමත් වුණා.

තරගයේ කාසියේ වාසිය දිනූ ශ්‍රී ලංකා කණ්ඩායම පළමුව පන්දු රැකීමට තීරණය කළ අතර, ඒ අනුව පළමුව පන්දුවට පහරදුන් එංගලන්තය නියමිත පන්දුවාර 20 අවසානයේ කඩුලු 4ක් දැවී ලකුණු 254ක් රැස් කළා.

එහිදී නායක හැරී බෘක් නොදැවී ලකුණු 114ක් රැස් කළ අතර, ජොස් බට්ලර් පන්දු 44කදී ලකුණු 80ක් ලබා ගත්තා.

ලකුණු 255ක දැවැන්ත ඉලක්කයක් හඹා ගිය ශ්‍රී ලංකා කණ්ඩායමට පන්දුවාර 19ක් අවසානයේ සියලුදෙනා දැවී රැස්කර ගත හැකි වූයේ ලකුණු 135ක් පමණි.

ශ්‍රී ලංකා ඉනිමේ වැඩිම ලකුණු ලාභියා වූ දුනිත් වෙල්ලාලගේ ලකුණු 33ක් රැස් කළ අතර, දසුන් ශානක ලකුණු 24ක් ලබා ගත්තා.

ඒ අනුව තරගය ලකුණු 119කින් ජයගත් එංගලන්තය තරගාවලියේ පෙරමුණ ගැනීමට සමත් වුණා.