සෙවනගල සීනි කර්මාන්තශාලාව වසා දමයි

සීමාසහිත ලංකා සීනි (පුද්ගලික) සමාගමේ සෙවනගල ඒකකයේ කර්මාන්තශාලාව නැවත දැනුම් දෙනතුරු දින නියමයක් නොමැතිව වසා දැමීමට පාලනාධිකාරිය තීරණය කර තිබෙනවා.

නිවේදනයක් නිකුත් කරමින් එම සමාගම සඳහන් කර ඇත්තේ සේවකයින් විසින් ක්‍රියාත්මක කරනු ලබන වැඩ වර්ජනය හේතුවෙන් ආයතනයට සිදුවන මූල්‍ය අලාභය අවම කර ගැනීමේ අරමුණින් මෙම පියවර ගත් බවයි.

පසුගිය 25 වනදා පස්වරු 2.00 සිට සෙවනගල ඒකකයේ සේවකයින් පිරිසක් රාජකාරිවලින් බැහැරවී නිෂ්පාදන කටයුතු ආරම්භ නොකිරීම හේතුවෙන්, පසුගිය 26 සහ 27 යන දෙදින තුළ අත්‍යවශ්‍ය සේවාවල නිරත සේවකයින් හැර අනෙකුත් සේවකයින්ට නිවාඩු ලබාදී තිබෙනවා.

මේ අතර, ඊයේ (28) යළි නිෂ්පාදන කටයුතු ආරම්භ කරන ලෙස ප්‍රධාන මෙහෙයුම් නිලධාරීවරයා විසින් දැනුම් දී තිබූ බවද එම නිවේදනයේ සඳහන් වනවා.

කෙසේ වෙතත්, කර්මාන්තශාලාවේ නිෂ්පාදන කටයුතු යළි ආරම්භ කිරීමෙන් අනතුරුවද සේවකයින් සුපුරුදු පරිදි වැඩ වර්ජනයේ නිරතවීම හේතුවෙන්, කර්මාන්තශාලාව මෙලෙස දින නියමයක් නොමැතිව වසා දැමීමට තීරණය කළ බව ලංකා සීනි සමාගම වැඩිදුරටත් සඳහන් කරනවා.