Porsche හි MHP ඒකකය TCS සමාගම මිලදී ගනී

ඉන්දියාවේ ප්‍රමුඛතම තොරතුරු තාක්ෂණ සමාගමක් වන Tata Consultancy Services (TCS) විසින් ජර්මානු සුඛෝපභෝගී මෝටර් රථ නිෂ්පාදක Porsche AG සමාගමට අයත් ‘MHP’ මෝටර් රථ සහ උපදේශන ඒකකය මිලදී ගැනීමට නියමිත බව වාර්තා වනවා.

TCS සමාගම සහ MHP වෙනුවෙන් යුරෝ බිලියන 1.25ක පස් අවුරුදු ආයෝජනයක් සිදුකිරීමට Porsche සමාගම එකඟ වී ඇති අතර, එම ගිවිසුමේ එක් පියවරක් ලෙස මෙම ගනුදෙනුව සිදුකිරීමට නියමිතයි.

ව්‍යාපාරික උපදේශන සහ මෘදුකාංග පාදක කරගත් මෝටර් රථ තාක්ෂණය සම්බන්ධයෙන් විශේෂඥතාවක් ඇති MHP සමාගමේ ව්‍යවසාය වටිනාකම යුරෝ මිලියන 320ක් ලෙස තක්සේරු කර තිබෙනවා.

ගනුදෙනුව ඉදිරි මාස 3ත් 4ත් අතර කාලය තුළ අවසන් කිරීමට අපේක්ෂා කරන බව සඳහන් වනවා.

වසර පහක ගිවිසුම යටතේ Porsche සමාගමේ ඉංජිනේරු, නිෂ්පාදන, මෙහෙයුම් සහ පාරිභෝගික සේවා අංශ සඳහා කෘත්‍රිම බුද්ධි තාක්ෂණය භාවිත කිරීම ඇතුළු නවීන මෝටර් රථ තාක්ෂණ සහ මෘදුකාංග පද්ධති සංවර්ධනය කිරීමට TCS සමාගම කටයුතු කිරීමට නියමිතයි.

මේ අතර Porsche සමාගමේ මව් සමාගම වන Volkswagen සමූහය චීන මෝටර් රථ නිෂ්පාදකයින්ගේ තරගකාරීත්වය, තීරුබදු සහ විදුලි වාහන නිෂ්පාදන වියදම් ඉහළ යාම හමුවේ පිරිවැය අඩු කරගැනීමට සහ ව්‍යාපාරික ව්‍යුහය සරල කිරීමට දැඩි පීඩනයකට මුහුණදී සිටින බවද වාර්තා වනවා.