පාස්කු ප්‍රහාර නඩුවේ තීන්දුව හෙට

පාස්කු ඉරුදින ත්‍රස්ත ප්‍රහාරය කුමන්ත්‍රණය කිරීම, ආධාර අනුබල දීම ඇතුළු චෝදනා 23,270කට අධික සංඛ්‍යාවක් යටතේ විත්තිකරුවන් 24 දෙනෙකුට එරෙහිව පවරා ඇති නඩුවේ තීන්දුව හෙට (22) ප්‍රකාශයට පත් කිරීමට නියමිතව තිබෙනවා.

මහාධිකරණ විනිසුරුවරුන් වන නවරත්න මාරසිංහ, රාමනාදන් කන්නන් සහ සුජීව නිශ්ශංක යන මහත්වරුන්ගෙන් සමන්විත ත්‍රිපුද්ගල මහාධිකරණ විනිසුරු මඩුල්ල හමුවේ මෙම නඩුව විභාග කෙරුණා.

නවුෆර් මවුලවි ඇතුළු විත්තිකරුවන් 24 දෙනෙකුට එරෙහිව නීතිපතිවරයා විසින් ගොනුකර තිබූ මෙම නඩුවේදී පැමිණිලි පාර්ශ්වය වෙනුවෙන් සාක්ෂිකරුවන් 2,309 දෙනෙකු සාක්ෂි ලබාදී තිබෙනවා.

දීර්ඝ කාලයක් පැවති සාක්ෂි විභාගයෙන් අනතුරුව පැමිණිලි සහ විත්ති පාර්ශ්වයන්ගේ සාක්ෂි විමසීම පසුගිය අගෝස්තු 24 වැනිදා අවසන් කෙරුණා.

ඉන් අනතුරුව තීන්දුව ප්‍රකාශයට පත් කිරීම සඳහා හෙට (22) දිනය නියම කළ බව අධිකරණය සඳහන් කර තිබෙනවා.