අධිකරණ ඇමතිට එරෙහි විශ්වාසභංගය කථානායකට භාරදෙයි

අධිකරණ සහ ජාතික ඒකාබද්ධතා අමාත්‍ය හර්ෂණ නානායක්කාර මහතාට එරෙහිව විපක්ෂය ගෙන ආ විශ්වාසභංග යෝජනාව අද (21) කථානායක වෛද්‍ය ජගත් වික්‍රමරත්න මහතා වෙත භාරදී තිබෙනවා.

මෙම යෝජනාව ඉදිරිපත් කර ඇත්තේ 2026 ජූලි 5 සහ 6 දෙදින මීගමුව බන්ධනාගාරයේ ඇති වූ ගැටුම්වලින් බන්ධනාගාර නිලධාරීන් සහ රැඳවියන් පිරිසක් ජීවිතක්ෂයට පත්වීමත්, තවත් පිරිසක් බරපතළ තුවාල ලැබීමත් සම්බන්ධයෙන් විෂයභාර අමාත්‍යවරයා සිය වගකීම් නිසි ලෙස ඉටු නොකළ බවට චෝදනා කරමින්.

විශ්වාසභංග යෝජනාවේ සඳහන් වන්නේ, 2024 අංක 2412/08 දරන අතිවිශේෂ ගැසට් නිවේදනය අනුව අධිකරණ අමාත්‍යවරයා වෙත පැවරී ඇති බන්ධනාගාර ප්‍රතිසංස්කරණ ප්‍රතිපත්ති සකස් කිරීම හා ක්‍රියාත්මක කිරීම, බන්ධනාගාර පරිපාලනය සහ ප්‍රතිසංස්කරණය, යටිතල පහසුකම් සංවර්ධනය මෙන්ම බන්ධනාගාර තදබදය අවම කිරීම ඇතුළු වගකීම් ප්‍රමාණවත් ලෙස ඉටු කර නොමැති බවයි.

ඒ අනුව බන්ධනාගාර පද්ධතියේ මතුව ඇති ගැටලු සම්බන්ධයෙන් අමාත්‍යවරයා දේශපාලන වශයෙන් වගකිව යුතු බව ද එහි අවධාරණය කර තිබෙනවා.

මෙම විශ්වාසභංග යෝජනාවට විපක්ෂයේ මන්ත්‍රීවරුන් 37 දෙනෙකුගේ අත්සන් ලැබී ඇති බව සඳහන්.