සලේට දීලා තියෙන සැප දැක්කහම මටත් සිරගත වෙන්න හිතෙනවා - ජගත් මනුවර්ණ

අත්අඩංගුවට පසුවන හිටපු රාජ්‍ය බුද්ධි සේවා අධ්‍යක්ෂ සුරේෂ් සලේ මහතාට ලබාදී ඇති සැප පහසුකම් ගැන ඇසු විට තමන්ටත් සිරගත වීමට සිතෙන බව ජාතික ජන බලවේගයේ පාර්ලිමේන්තු මන්ත්‍රී, සිනමා නළු ජගත් මනුවර්ණ මහතා පවසනවා.

ඔහු මෙම අදහස් පළ කළේ තලාතුඔය කර්චෝබ්‍රිජ් මාර්ගයේ අලුත්වැඩියා කටයුතු නිරීක්ෂණය සඳහා ඊයේ (02) එහි ගිය අවස්ථාවේදී මාධ්‍ය වෙත අදහස් දක්වමින්.

“දැන් ලංකාවේ දූෂණ වංචාවලට ගෑවිච්ච සියලු දෙනා සලිත වෙලා ඉන්නෙ. ඒක ජනතාවගෙත් අපේක්ෂාව. මොකද මේ යුක්තියේ යුගය. විශේෂයෙන්ම මේ සුරෙෂ් සලේ වගේ කෙනෙක්ගේ බිරිඳට සහ ඔහුගේ දරුවන්ට පවුලේ හිතවතුන්ට කියන්න ඕනෙ, සුරේෂ් සලේ වගේ කෙනෙක්ව බේරාගන්න ඕනෙ අපෙන් නෙවෙයි රාජපක්ෂලාගෙන්.

ඔහුව පරෙස්සම් කරගන්න ඕනෙ උදය ගම්මන්පිලලාගෙන්. ඔහුව පරෙස්සම් කරගන්න ඕනෙ විමල් වීරවංශලාගෙන්, සරත් වීරසේකරලාගෙන්. මොකද ඔහුට තර්ජන තියෙන්නෙ ඔවුන්ගෙන්.

අපේ ආනන්ද විජේපාල මහජන ආරක්ෂක ඇමතිතුමා ඔහුට ලබාදීලා තියෙන සැප පහසුකම් ගැන කිව්වා. සිරගත වෙන්න හිතෙනවා ඒ දෙන සැප පහසුකම් බැලුවාම.

ගැලවිච්ච දත් පවා දාලා දීලා තියෙනවා. දැන් ඔහු නහයෙන් කන්නෙ නැතිව කටින් කනවා කියලා තීරණය කරලා තියෙනවා, ඉතාම හොඳයි. සහ අර අදාළ මුරපද ලබාදෙන්න”