ලෝක මව්වරුන්ගේ දිනය අදයි

“අම්මා” කියන වචනය අකුරු කිහිපයකින් ලියන්න පුළුවන් වුණත්, ඒ වචනයේ තියෙන ආදරය, කැපවීම, දයාබරත්වය සහ උතුම්කම නම් ලෝකයක් තරම් විශාලයි. දරුවෙකු මෙලොවට ගෙන ඒමට දසමසක් කුස දරාගෙන, තම රුධිරය කිරි කර පොවා, නින්ද අහිමි කරගෙන, දුක් විඳගෙන දරුවාගේ ජීවිතය ආලෝකවත් කරන්නේ අම්මාය. දරුවා සිනාසෙන විට සතුටින් පිරෙන්නේත්, දරුවා දුක්වෙන විට හදවතින්ම වේදනා විඳින්නේත් අම්මාමය. ලොව කොතැනකවත් අම්මාගේ ආදරයට සමාන ආදරයක් සොයාගත නොහැක. ඇය දරුවා වෙනුවෙන් තම ජීවිතයම කැප කරන උතුම්ම චරිතයයි. දරුවාට පළමු ගුරුවරිය, පළමු මිතුරිය, පළමු රැකවරණය වන්නේද අම්මාය. එබැවින් ලෝකයේ උතුම්ම පදවියක් ලෙස සැලකෙන “මව් පදවිය” අගය කිරීම සඳහා ලෝක මව්වරුන්ගේ දිනය සමරනු ලබයි. ලොව බොහෝ රටවල් මැයි මාසයේ දෙවන ඉරිදා දිනය මව්වරුන්ගේ දිනය ලෙස සමරයි. එය මවකගේ අපරිමිත සෙනෙහස, කැපවීම සහ ගුණ සිහිපත් කරන සුවිශේෂී දිනයකි. අම්මා ගෙදර බුදුන් යැයි කියන්නේ ඇයගේ උතුම්කම නිසාය. තමන්ට කන්න නැති වුණත් දරුවාට කන්න දෙන, තමන්ට අලුත් ඇඳුමක් නොගත්තත් දරුවා සතුටින් තබන, දරුවාගේ අනාගතය වෙනුවෙන් දහසක් කැපකිරීම් කරන චරිතය අම්මාය. අද සමාජයේ බොහෝ දෙනා කාර්යබහුල ජීවිත අතරේ අම්මාගේ වටිනාකම අමතක කරමින් සිටිති. ඇතැම් දරුවන් මව්පියන්ගේ දුක නොදැන ඔවුන් තනිකර දමන අවස්ථාද දැකිය හැකිය. එවැනි සමාජයක මව්වරුන්ගේ දිනය යනු අම්මාගේ ගුණ සිහිපත් කරමින් ඇයට ආදරය, ගෞරවය සහ කෘතඥතාව පිරිනමන වැදගත් අවස්ථාවකි. අපට ජීවිතය දුන්, අප වෙනුවෙන් සිනහවෙන් දුක් දරාගත් අම්මාගේ සෙනෙහස කිසිදා මිල කළ නොහැක. ඇයගේ ආදරය හුස්ම පොද පවතින තුරු නිම නොවන සදාකාලික බැඳීමකි. ඒ නිසා මව්වරුන්ගේ දිනයක් පමණක් නොව, සෑම දිනකම අම්මාට ආදරය කරමින්, ඇය සතුටින් තබමින්, ඇයගේ ගුණ අගය කරමින් ජීවත් වීම සෑම දරුවෙකුගේම යුතුකමයි.