ලොව විශාලතම විවෘත මූලාශ්‍ර ඇති AI ආකෘතියක් චීනයෙන් එළිදක්වයි

චීනයේ Moonshot AI සමාගම විසින් නිෂ්පාදනය කළ Kimi K3 නම් විවෘත මූලාශ්‍ර කෘත්‍රිම බුද්ධි (AI) මහා පරිමාණ ආකෘතිය පසුගිය 27 වැනිදා සිට ලොව පුරා භාවිතය සඳහා නොමිලේ විවෘත කර තිබෙනවා.

ට්‍රිලියන 2.8ක පරාමිතීන්ගෙන් සමන්විත Kimi K3, මේ දක්වා නිර්මාණය කළ විශාලතම විවෘත මූලාශ්‍ර AI ආකෘතිය ලෙස සැලකෙනවා.

Moonshot AI සමාගමේ ප්‍රධානතම AI නිෂ්පාදනය වන මෙම ආකෘතිය සමඟ සම්පූර්ණ ආකෘති දත්ත, තාක්ෂණික වාර්තා සහ පුහුණු කිරීම සඳහා අවශ්‍ය මූලික තාක්ෂණික පහසුකම් ද සංවර්ධකයින්ට ලබාදී තිබෙනවා.

ඒ අනුව, ලොව පුරා AI සංවර්ධකයින්ට මෙම ආකෘතිය නොමිලේ බාගත කර තමන්ගේම පරිගණක පද්ධති මත භාවිතා කිරීමට හැකියාව ලැබෙනවා.

චීනය මීට පෙර ද විවෘත මූලාශ්‍ර AI ආකෘති හඳුන්වා දී තිබුණද, ට්‍රිලියන 2.8ක පරාමිතීන් සහිත මෙතරම් විශාල AI ආකෘතියක් පූර්ණ වශයෙන් ගෝලීයව විවෘත කළ පළමු අවස්ථාව ලෙස මෙය සැලකෙනවා.

මෙම වසර තුළ චීනයේ ප්‍රමුඛ පෙළේ AI සමාගම් රැසක් සිය AI ආකෘති විවෘත මූලාශ්‍ර ලෙස නිකුත් කිරීමට පියවර ගෙන ඇති අතර, එය ගෝලීය AI තරගකාරීත්වයේ නව ප්‍රවණතාවක් ලෙස ද සැලකෙනවා.