ලබන සැප්තැම්බර්වල සිට සියලු පොදු ප්‍රවාහන බස් රථවල තත්ත්ව පරීක්ෂාවක්

පොදු ප්‍රවාහන සේවා සපයන බස් රථ ඇතුළු සියලු රථවල තත්ත්ව පරීක්ෂාවක් සිදු කිරීමට තීරණය කර තිබෙනවා.

මාර්ග ආරක්ෂාව පිළිබඳව ජාතික කවුන්සිලයේ සභාපති මංජුල කුලරත්න මහතා පවසන්නේ මෙම ක්‍රියාවලිය සැප්තැම්බර් මස සිට ආරම්භ කිරීමට බලාපොරොත්තු වන බවයි.

මෙරට පොදු ප්‍රවාහනයේ දී සිදුවන රිය අනතුරුවලට හේතුව ලෙස රියදුරන්ගේ නොසැලකිල්ල සහ වාහනවල පවතින විවධ දුර්වලතා ඇති බවත් ඒ පිළිබඳව අවධානය යොමු කරමින් පොදු ප්‍රවාහනයේ යෙදෙන බස් රථ ඇතුළු සියලු වාහනවල තත්ත්ව පරීක්ෂාවක් සිදුකරන බවත් ඔහු කියා සිටිනවා.

අදාළ තත්ත්ව පරික්ෂාව සඳහා සුදුසුකම් ලත් තාක්ෂණික නිලධාරීන් බඳවා ගැනීම වෙනුවෙන් දැනටමත් අයදුම්පත් කැඳවා ඇති බව සඳහන්.

ඒ මහතා පෙන්වා දෙන්නේ එම බඳවා ගැනීම්වලින් අනතුරුව සැප්තැම්බර් අග වන විට මෙම ක්‍රියාවලිය ආරම්භ කිරීමට හැකි වනු ඇති බවයි.

මේ අනුව මෙරට පොදු ප්‍රවාහන සේවයේ යෙදෙන සියලුම රථවාහනවල තත්ත්වය පරීක්ෂාවන් සිදු කිරීමට පියවර ගන්නා බව ඔහු වැඩිදුරටත් පෙන්වා දුන්නා.