රත්මලානෙන් ගුවන්ගත වූ ගුවන් යානයක සරුංගල් නූලක් පැටලෙයි

රත්මලාන ගුවන්තොටුපොළෙන් පුහුණු ගුවන් ගමනක් සඳහා අද (15) ගුවන්ගත වූ ශ්‍රී ලංකා ගුවන් හමුදාවට අයත් Y-12 වර්ගයේ ගුවන් යානයක සරුංගල් නූලක් පැටලීම හේතුවෙන් එම යානය ආරක්ෂිතව යළි ගොඩබස්වා තිබෙනවා.

මෙම සිද්ධියෙන් කිසිදු පුද්ගල හානියක් වාර්තා වී නොමැති අතර, ආරක්ෂිත ක්‍රියාමාර්ගයක් ලෙස යානය යළි රත්මලාන ගුවන්තොටුපොළ වෙත ගොඩබැස්වූ බවයි වාර්තා වන්නේ.

මේ අතර, ගුවන් ගමන් ආරක්ෂාව සහ මගීන්ගේ ජීවිත සුරක්ෂිත කිරීමේ අරමුණින් කටුනායක, රත්මලාන, හිඟුරක්ගොඩ, චීනවරාය, අනුරාධපුර, පලාලි, කටුකුරුන්ද, කොග්ගල, වව්නියාව, වීරවිල සහ මත්තල යන ගුවන් තොටුපොළ හා ගුවන් ධාවන පථ ආශ්‍රිත ප්‍රදේශවල සරුංගල් යැවීමෙන් සම්පූර්ණයෙන්ම වැළකී සිටින ලෙස අදාළ අංශ ජනතාවගෙන් ඉල්ලීමක් කර තිබෙනවා.

ගුවන් යානාවලට සරුංගල් නූල් පැටලීම බරපතළ ආරක්ෂක අවදානමක් වන බැවින්, ගුවන් තොටුපොළ අවට ප්‍රදේශවල සරුංගල් යැවීමෙන් වැළකීම අත්‍යවශ්‍ය බවද බලධාරීන් අවධාරණය කරනවා.