ටාජ් හිදී එජාප සහ සජබ අතර සාකච්ඡාවක් - රනිල්ගේ නඩුව ගැනත් තීන්දුවක් ගනී

එක්සත් ජාතික පක්ෂය සහ සමඟි ජන බලවේගය එක් කිරීමට අදාළ තවත් තීරණාත්මක සාකච්ඡාවක් විපක්ෂ නායක සජිත් ප්‍රේමදාස මහතාගේ ප්‍රධානත්වයෙන් පවත්වා තිබෙනවා.

ටාජ් සමුද්‍රා හෝටලයේ දී මෙම සාකච්ඡාව පවත්වා ඇති බවයි වාර්තා වන්නේ.

එක්සත් ජාතික පක්ෂය වෙනුවෙන් එම පක්ෂයේ නියෝජ්‍ය නායක රුවන් විජේවර්ධන, මහලේකම් තලතා අතුකෝරල, ජාතික සංවිධායක සාගල රත්නායක, උප නායක අකිල විරාජ් කාරියවසම්, උප සභාපති නවීන් දිසානායක යන මහත්වරුන් මේ සඳහා එක්ව තිබෙනවා.

සමඟි ජන බලවේගය වෙනුවෙන් එම පක්ෂයේ නායකත්වයට අමතරව සජබ මහලේකම් පාර්ලිමේන්තු මන්ත්‍රි රංජිත් මද්දුම බණ්ඩාර, ලක්ෂ්මන් ෆොන්සේකා යන මහත්වරුන් සාකච්ඡාවට සහභාගී වී ඇති බව වාර්තා වනවා.

ලබන 28 වනදා එජාප නායක හිටපු ජනාධිපති රනිල් වික්‍රමසිංහ මහතාට රිමාන්ඩ් භාරයට පත්වූ නඩුව නැවත විභාග වන බැවින් එදිනට සජබ පාර්ලිමේන්තු මන්ත්‍රීවරුන් ඇතුළු පාක්ෂිකයින් එම අවස්ථාවට එක් කිරීමට ද සමඟි ජන බලවේගය මෙහිදී එකඟත්වය පළකර ඇති බවද වාර්තා වනවා.

ඊට අමතරව ඉදිරි මැතිවරණවලදී එජාපය සහ සජබ ඇතුළු විපක්ෂයේ පක්ෂ එකට එක්ව කටයුතු කිරීමේ වැදගත්කම මෙහිදී දීර්ඝ සාකච්ඡාවට ලක්ව තිබෙනවා.