පිල්ලෙයාන් බලන්න ගියා තමයි - ඒක රහසක් නෙමෙයි

2018 සහ 2019 කාල සීමාවන් හි TMVP නායක සිවනේසතුරෙයි චන්ද්‍රකාන්තන් හෙවත් පිල්ලෙයාන් බන්ධනාගාරගතව සිටියදී තමන් ඔහු බැලීමට ගිය බව රහසක් නොවන බව ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී නාමල් රාජපක්ෂ මහතා පවසනවා.

ඔහු මේ බව සඳහන් කරන්නේ සිය X ගිණුමේ සටහනක් තබමිනි.

තමන් එහි ගිය බවට බන්ධනාගාර වාර්තා ඕනෑම අවස්ථාවක ලබාගත හැකි බවත් එම වකවානුවේදී ඔහු 2015 ජනාධිපතිවරණයට මෙන්ම 2018 පළාත් පාලන මැතිවරණයට ද තරඟ කරමින්, තම සන්ධානයේ පාර්ශවකරුවෙකු ලෙස කටයුතු කළ බවත් මන්ත්‍රීවරයා එහිදී කියා සිටියා.

ඔහුගේ සටහන පහතින්,

"2018/19 කාලසීමාවේදී බන්ධනාගාරගතව සිටි TMVP නායක සිවඥානම් චන්ද්‍රකාන්තන් හෙවත් පිල්ලෙයාන් හමුවීමට මා ගිය බව රහසක් නොවේ. ඇත්ත වශයෙන්ම, මගේ එම පැමිණීම් පිළිබඳ බන්ධනාගාර වාර්තා ඕනෑම අයෙකුට ලබාගත හැකිය. එකල ඔහු 2015 ජනාධිපතිවරණයට සහ 2018 පළාත් පාලන මැතිවරණයට තරඟ කළ සන්ධානයේ පාර්ශවකරුවෙකු විය.

පෙනී යන පරිදි, පාස්කු ප්‍රහාරය සම්බන්ධයෙන් විමර්ශනය කිරීමට අපරාධ පරීක්ෂණ දෙපාර්තමේන්තුව (CID) ප්‍රංශය දක්වා ගොස් ඇති අතර, මෙය රජයේ ප්‍රමුඛතාවයන් පිළිබඳව ප්‍රශ්න මතු කරයි. මා පිල්ලෙයාන් හමුවූ බව තහවුරු කර ගැනීමට පමණක් නිලධාරීන් එතරම් දුරක් ගමන් කළේ නම්, එය පැහැදිලිවම මහජන මුදල් නාස්තියකි. මා දන්නා පරිදි, පිල්ලෙයාන් දැනට පාස්කු ප්‍රහාර සම්බන්ධයෙන් රඳවා තබාගෙන නොමැත. එසේ නම්, මෙම මාධ්‍ය සංදර්ශන හරහා රජය හරියටම කවුරුන්ව ඒත්තු ගැන්වීමට උත්සාහ කරන්නේද?

ජාතික ජන බලවේගය (NPP) පවා පාස්කු ප්‍රහාරය පිළිබඳව විවිධ අවස්ථාවලදී විවිධ කථා පවසා ඇත. රජය දැන් මෙම ඛේදවාචකය දේශපාලන ප්‍රතිවාදීන් ඉලක්ක කර ගැනීමට යොදා ගන්නේ නම්, එය තවමත් සැබෑ පිළිතුරු සහ යුක්තිය අපේක්ෂාවෙන් සිටින වින්දිතයන්ට සහ ඔවුන්ගේ පවුල්වලට කරන බලවත් අසාධාරණයකි.

ඕනෑම සාධාරණ විමර්ශනයකට මුහුණ දීමට අප සූදානම් වන අතර, පවතින සැකයන් විවෘතව සහ විනිවිදභාවයෙන් යුතුව නිරාකරණය කර ගැනීමට අපරාධ පරීක්ෂණ දෙපාර්තමේන්තුවට පූර්ණ සහයෝගය ලබා දෙන්නෙමු. දේශපාලන නාට්‍ය සහ මාධ්‍ය සිරස්තල කෙරෙහි අවධානය යොමු කරනවා වෙනුවට, රජය කළ යුත්තේ රටේ ජනතාව වෙනුවෙන් අර්ථවත් ප්‍රතිඵල ලබා දීම කෙරෙහි අවධානය යොමු කිරීමයි."